Madhwavijaya - ಶ್ರೀಮಧ್ವವಿಜಯಭಾವಸಂಗ್ರಹ-ಸರ್ಗ ೦೧_೨೩

ಸೇವಕಜನರಲ್ಲೇ ಇವನಿಗೆ ಸಮನಾದ ಮತ್ತೊಬ್ಬ ಜೀವನಿಲ್ಲ. ಇವನಂತೆ ಆತ್ಮನಿವೇದನೆ ಮಾಡಿಕೊಂಡ ಭಕ್ತನಿಲ್ಲ. ಅದಕೆ ರಾಮ ತನ್ನನ್ನು ತಾನು ಇವನಿಗೆ ಅರ್ಪಿಸಿಕೊಂಡ.

ಹೃದೋರು-ಸೌಹಾರ್ದ-ಭೃತಾsಧಿಮೌಲಿ ನ್ಯಸ್ತೇನ ಹಸ್ತೇನ ದಯಾರ್ದ್ರ-ದೃಷ್ಟ್ಯಾ ।

ಸೇವಾ-ಪ್ರಸನ್ನೋsಮೃತ-ಕಲ್ಪ-ವಾಚಾ ದಿದೇಶ ರಾಮಃ ಸಹ-ಭೋಗಮಸ್ಮೈ ॥೦೧.೨೩॥

ಮಾಡಿದ ಸೇವೆಗೊಲಿದು, ಸೊದೆತುಂಬಿದ ನಲ್ನುಡಿಗಳನಾಡಿ, ಕರುಣೆಯಿಂದ ತೊಯ್ದ ಕಂಗಳಿಂದ ನೋಡಿ, ಎದೆತುಂಬ ತುಂಬಿದ ಪ್ರೀತಿಯಿಂದ ಇವನ ತಲೆಯ ಮೇಲೆ ಕೈಯನಿರಿಸಿ ಕೊಟ್ಟನಿವನಿಗೆ ರಾಮ, ಜೊತೆಗುಣ್ಣುವ ಬ್ರಹ್ಮಪದವನ್ನು!

ಅಮೃತದಂಥಾ ಮಾತನ್ನಾಡಿದ ರಾಮ.

"ಮದ್ಭಕ್ತೌ ಜ್ಞಾನಪೂರ್ತೌ ಅನುಪಧಿಕಬಲಪ್ರೋನ್ನತೌ ಸ್ಥೈರ್ಯಧೈರ್ಯಸ್ವಾಭಾವ್ಯಾಧಿಕ್ಯತೇಜ-ಸ್ಸುಮತಿಶಮದಮೇಷ್ವಸ್ಯ ತುಲ್ಯೋ ನ ಕಶ್ಚಿತ್ । ಶೇಷೋ ರುದ್ರಸ್ಸುಪರ್ಣೋsಪ್ಯುರುಗಣಸಮಿತೌ  ನೋ ಸಹಸ್ರಾಂಶತುಲ್ಯಾಃ ॥ " ಎಂಬೀತ್ಯಾದಿ ಹನುಮನ ಬಗೆಗಿನ ಪ್ರಶಂಸೆಯ ಮಾತು.

ತ್ರಿವಿಕ್ರಮಪಂಡಿತರೂ ಈ ಪ್ರಸಂಗವನ್ನು ಬಣ್ಣಿಸಿದ್ದಾರೆ, ವಾಯುಸ್ತುತಿಯಲ್ಲಿ,

"ಸಹಭುಜಮಕರೋದ್ರಾಮನಾಮಾ ಮುಕುಂದಃ, ದುಷ್ಪ್ರಾಪೇ ಪಾರಮೇಷ್ಠ್ಯೇ ಕರತಲಮತುಲಂ ಮೂರ್ಧ್ನಿ ವಿನ್ಯಸ್ಯ ಧನ್ಯಂ ತನ್ವನ್ ಭೂಯಃ ಪ್ರಭೂತಪ್ರಣಯವಿಕಸಿತಾಬ್ಜೇಕ್ಷಣಸ್ತ್ವೇಕ್ಷಮಾಣಃ ॥ ", ಎಂದು.

ಛಂದಸ್ಸು ಆರ್ದ್ರಾ ಎಂಬ ಉಪಜಾತಿಪ್ರಬೇಧ.

ದಯಾರ್ದ್ರ ರಾಮ, ಭಕ್ತ್ಯಾರ್ದ್ರ ಹನುಮ. ಇಬ್ಬರ ಸವಿ ಸಂಬಂಧದ ನೇಮ.